პრაღის ცენტრში ვაცლავის მოედნის სათავეში მდგარი შენობა, რომელიც ადრე ჩეხოსლოვაკიის პარლამენტს ეკუთვნოდა, შემდეგ კი რადიო ”თავისუფლების” შტაბ-ბინა იყო, ეროვნულ მუზეუმს გადაეცა. ”თავისუფლება” ოდნავ მოშორებით, საკუთარ ახალ შენობაში გადასახლდა, ძველი შენობის გასაღები კი დღეს საზეიმო ვითარებაში მუზეუმის ადმინისტრაციამ ჩაიბარა.

დღესვე დაიწყო იმ ბეტონის კედლის დემონტაჟი, რომელიც 2001 წელს რადიოს უსაფრთხოების მიზნით აშენდა და რომელიც პრაღელების გაღიზიანების მიზეზი არაერთხელ გამხდარა. კედლის დემონტაჟი 11 ივნისისთვის დასრულდება და ირგვლივ როგორც საავტომობილო ასევე ფეხით მოსიარულეთა მოძრაობა გაიოლდება.

მუზეუმი თავის ახალ ობიექტს 15 აგვისტოს გახსნის, ხოლო პირველი ექსპოზიცია აქ 17 ნოემბერს გამოიფინება სიმბოლური დასახელებით Be Free! ის ეძღვნება ”რკინის ფარდის” დაცემისა და ხავერდოვანი რევოლუციის 20 წლისთავს.

მერვე დღე პრაღაში ხანგრძლივი მივლინებით ჩამოსული კოლეგის მონახულებისა და დაკვალიანების გარდა ტრანსპორტის (ტრამვაის) მუზეუმის შესწავლას დავუთმე. 

მუზეუმი მოთავსებულია ტრამვაის მოქმედი დეპოს ერთერთ სადგომში. შესვლისას შეცდომით დეპოს ეზოში ფორმიანი ვატმანების თავშეყრის ადგილას აღმოვჩნდი. ამან კი შედარების გაკეთების საშუალება მომცა. უცხოელი ტურისტებისთვის და არამარტო მათთვის გახსნილი მუზეუმის ეზო და სადგომის მდგომარეობა ზუსტად ისეთივია როგორიც მოქმედ დეპოში. უნებლიედ თბილისის ტრანსპორტის ”გარაჟები” გამახსენდა

მუზეუმში 35 კრონი გადავიხადე, ეს თითქმის 3 ლარია. იქ მოთავსებული ტრამვაისა და ამ ტრანსპორტთან დაკავშირებული დამხმარე მანქანების დიდი ნაწილი აღდგენილია და განახლებული. ამ ფოტოზე გამოსახული ვაგონი კი ზუსტად იმ მდგომარეობაშია როგორშიც იყო 1970 წელს, ექსპლოატაციის დასრულებისას. თავად კი გამოშვებულია 1930 წელს. მას ჩაბმული აქვს მეორე ვაგონი (ტრაილერი) რომელსაც ძრავი არ გააჩნია. ასეთი შემადგენლობა ახლაც დადის პრაღის ქუჩებში და ძირითადად ტურისტებს იზიდავს.