პრაღაში ”აღმოსავლეთის პარტნიორობის” სამიტი დასრულებულია. ევროკავშირის ”აღმოსავლეთის პარტნიორობის” დეკლარაციას საქართველო, აზერბაიჯანი, თურქეთი, ბელორუსი, მოლდოვა და უკრაინა შეუერთდნენ.
ევროკომისიის ხელმძღვანელმა ჟოზე მანუელ ბაროზომ განაცხადა, რომ ”აღმოსავლეთის პარტნიორობა” საუკეთესო იარაღია ევროკავშირის მეზობელ ქვეყნებთან დაახლოებისთვის.
”ეს პროგრამა დაეხმარება 6 ქვეყანას რეფორმების გატარებაში, რაც აუცილებელია იმისთვის, რომ მათ საჭირო სტანდარტები დააკმაყოფილონ”, – აღნიშნა ბაროზომ.
”პრაღის გაზაფხული” მოეწყობა ივნისის ბოლომდე. ტური იქნება რაც შეიძლება იაფი და მეგობრული ხასიათის. ეს იმას ნიშნავს, რომ შესაძლებელია სასტუმროს ნაცვლად ”აპარტამენტებში” დაბინავება (სახლში სადაც არის რამდენიმე საძინებელი ოთახი, სამზარეულო, ბარი…). კომფორტის დონით სასტუმროებს არ ჩამოუვარდება, ეგაა რომ დილის საუზმის მომზადება საკუთარ მარიფათზეა დამოკიდებული. ასევე მნიშვნელოვანი ეკონომია გაკეთდება თვითმფრინავის ბილეთებზეც.
ვისაც სასტუმროში დაბინევების სურვილი აქვს მათი მოთხოვნაც დაკმაყოფილდება.
ამიტომ პრაღაში გასეირნების მსურველებმა იჩქარეთ სანამ სასტუმროებში ჯერ კიდევ მოიძებნება თავისუფალი ნომრები.
საგაზაფხულო ტური 7 დღე და 6 ღამე – სავარაუდო ღირებულებაა 900 ევრო.
ფასი იცვლება ექსკურსიების რაოდენობისა და სასტუმროს კლასის მიხედვით, ასევე ერთ ნომერში დაბინავების რაოდენობის მიხედვით.
ტურში მონაწილეობის მსურველებმა ტელეფონის ნომრები და სხვა ინფორმაცია გამოგზავნეთ შემდეგ მისამართზე: mchedlidze@gmail.com
რა შეიძლება აქ დაიწეროს, პაღაში უამრავი და ერთმანეთისგან განსხვავებული ლუდსახარშია. ჩვენთან ლუდსახარშს ლუდის ქარხანას ეძახიან. პრაღაში კი ლუდსახარში უფრო ლუდის რესტორნებს და ბარებს ჰქვია. ჩვეულებრივ რესტორანში ლუდის სახარში ქვაბები დგას, ნედლი ლუდის სუნი ტრიალებს და იქვე ჩამოსხმული ლუდის დაგემოვნებას არაფერი სჯობს
ამ დღეებში მეტი არაფერი მსმენია ობამა უზარმაზარი დაცვით ჩამოვიდაო და კაი დიდი ნაწილი წინასწარვე დაბანაკდა პრაღაშიო… მაგრამ რაც არ უნდა ბევრი დამცველი ჩამოეყვანა, პრაღის ჰრადზე, საიდანაც მთელი ქალაქი ხელის გულზე იშლება და რომელიც პრაღის ნებისმიერი კუთხიდან მოსჩანს, ტრიბუნის მოწყობა და გრძელი სიტყვით გამოსვლა დაცვის გარდა სიმამაცესაცმოითხოვს.
ობამამ სიმამაცე მხოლოდ პრაღაში შემაღლებულ ადგილზე სიტყვით გამოსვლით არ გამოიჩინა. ის ატომური იარაღის შემცირების ინიციატივით გამოდის და მთელს მსოფლიოს ჰპირდება, რომ პირად მაგალითს აჩვენებს. ობამამ უკვე კარგად ისწავლა საქართველოს კუთხეების სახელები, ყოველ შემთხვევაში ორი მათგანი და ეს დღეებია სულ იმეორებს და პრაღაშიც აღნიშნა, რომ აშშ სამხრეთ ოსეთისა და აფხაზეთის დამოუკიდებლობას არასოდეს აღიარებს.
ვრცელი სიტყვით გამოსვლის შემდეგ ობამა ჰრადის შესასვლელთან შეკრებილ ხალხში გაერია და დიდი სიამოვნებით მოიკითხა პირველ რიგებში მდგარი თაყვანისმცემლები.
ძლივს დრო გამოვნახე და მაშინაც პოლიტიკაზე უნდა ვწერო
მოკლედ საქართველოს დიდი მეგობარი და მხარდამჭერი კაცი მირეკ ტოპოლანეკი და მისი მთავრობა შეავიწროვეს. პარლამენტმა გასულ კვირაში უნდობლობის ვოტუმი გამოუცხადა. ალბად ბევრი მკითხაობა არ უნდა იმას ვისი დამსახურებაა ეს, მაგრამ მაინც: ცხადია რომ სოციალ-დემოკრატები და კომუნისტები კატა-ძაღლივით ვერ იტანენ მემარჯვენე პოლიტიკოსებს, თუნდაც ცენტრისტი იყოს. და თუ ამ ყველაფერს პუტინის ინტერესები და ფულიც დაემატა, მაშინ პრაღაში ტანკების შემოჯლიგინება სულაც არაა საჭირო, ისე ხერხდება ”რეჟიმის შეცვლა”.
ჩეხეთის რესპუბლიკის დედაქალაქში პრაღაში მიმინარეობს დოკუმენტური ფილმების მეცხრე საერთაშორისო ფესტივალი ”ერთი მსოფლიო”. ეს ფესტივალი მსოფლიოს სხვა კინოფორუმებისგან ერთი მნიშვნელოვანი ასპექტით გამოირჩევა, საკონკურსო და კონკურსგარეშე პროგრამაში წარმოდგენილი ფილმების თემატიკა ადამიანის უფლებებია. კინოკრიტიკოსებისა და კინოს მოყვარულების გარდა, ფესტივალს მსოფლიოს სხვადასხვა ქვეყნიდან ჩამოსული აქტივისტებიც ესწრებიან. წელს ”ერთი მსოფლიოს” კინოფესტივალზე საქართველო წარმოდგენილია სალომე ჯაშის ფილმით ”დადუმებულნი”, რომელიც მოკლემეტრაჟიანი ფილმების კონკურსში მონაწილეობს.
სტრახოვის მონასტერიდან პრაღის მშვენიერი ხედები იშლება. თავად მონასტერიც ძალიან საინტერესოა, ბიბლიოთეკაც, მაგრამ უფრო საინტერესოდ ამ მონასტრის ეზოში, ერთ პატარა შენობაში მოწყობილი მინიატურების მუზეუმი მომეჩვენა.
ნემსის ყუნწში მოთავსებული აქლემების ქარავანი, ადამიანის თმაზე განლაგებული მატარებლის ვაგონები, მარცვლის გულში ჩახატული პუშკინი, მამონტის ძვალზე შესრულებული მინიატურული ნახატები და ასე შემდეგ – ციმბირელი მხატვრის ანატოლი კონენკოს ნამუშევრებია. მათი უმრავლესობის ნახვა მხოლოდ მიკროსკოპითაა შესაძლებელი. შეუარაღებელი თვალით პატარა მარცვალი ან მხოლოდ თმა ჩანს.
გლობალური ეკონომიკური კრიზისის შედეგად, მთელ ევროპაში ათასობით ადამიანი უსამსახუროდ დარჩა. ჩეხეთის რესპუბლიკის ხელისუფლებამ დასაქმების მიზნით ემიგრირებული უცხოელების პრობლემის მოსაგვარებლად ახალ მეთოდს მიმართა. უცხოელები, ეგრეთ წოდებული ”გასტარბაიტერები”, 500 ევროსა და შინ დასაბრუნებელ უფასო ავიაბილეთს მიიღებენ, თუ სამშობლოში დაბრუნდებიან. აზიიდან ემიგრირებული მუშახელის ნაწილი ამ საშუალებას იყენებს, მაგრამ უკრაინელები, რომლებიც ჩეხეთში სამუშაოდ ჩამოსული უცხოელების თითქმის ერთ მესამედს შეადგენენ, უარს ამბობენ ჩეხეთის მთავრობის წინადადებაზე და ადგილზე დარჩენას ამჯობინებენ. უფრო დაწვრილებით…
20 თებერვლიდან 23 თებერვლის ჩათვლით ჩეხეთის რესპუბლიკის დედაქალაქ პრაღაში პნევმატური პისტოლეტით სროლაში ევროპის ჩემპიონატი ტარდება. ქართველმა სპორტსმენმა ნინო სალუქვაძემ 10 მეტრიან დისტანციაზე პნევმატური იარაღიდან სროლაში ქალთა შორის მეორე შედეგი აჩვენა და ვერცხლის მედლის პრიზიორი გახდა. პირველი ადგილი წილად ხვდა ბულგარეთის სპორტსმენს, ხოლო მესამე ადგილზე ჩეხეთის რესპუბლიკის წარმომადგენელი გავიდა.
კარგი იყო, ხაჭაპურს და ნიგვზიანს მონატრებული გემრიელად დავრნაყდი. ამ დროს პრაღის რესტორნების დიდი უმრავლესობა სიცარიელეს უჩივის, რესტორანი ”უ ირმი” (ირმასთან) კი სავსე იყო ქართული სამზარეულოს, თუ იქაური სიტუაციის მოყვარული ხალხით. ერთადერთი რაზეც თურმე კლიენტებს დაუჩივლიათ და თავად ირმაც განიცდიდა, ”თელიანი ველის” ამ ბოლო დროს შელანძღული ღვინოა. ნეტა რამდენი ონიშჩენკო სჭირდება ამ პრობლემის მოგვარებას?
პრაღაში ”აღმოსავლეთის პარტნიორობის” სამიტი დასრულებულია. ევროკავშირის ”აღმოსავლეთის პარტნიორობის” დეკლარაციას საქართველო, აზერბაიჯანი, თურქეთი, ბელორუსი, მოლდოვა და უკრაინა შეუერთდნენ. 
